নতুন দিল্লী : শুকুৰবাৰে অসমৰ মুখ্যমন্ত্ৰী ড৹ হিমন্ত বিশ্ব শৰ্মাই গৃহমন্ত্ৰী অমিত শ্বাহ আৰু স্বাস্থ্যমন্ত্ৰী জে পি নাড্ডাক সাক্ষাৎ কৰে । সাক্ষাৎকালত মুখ্যমন্ত্ৰীয়ে ৰাজ্যখনৰ সৈতে জড়িত কেইবাটাও জটিল বিষয়ৰ ওপৰত আলোচনা কৰে বুলি বিষয়াসকলে উল্লেখ কৰে ।
এগৰাকী জ্যেষ্ঠ বিষয়াই ইটিভি ভাৰতৰ আগত কয়, "মুখ্যমন্ত্ৰীয়ে অমিত শ্বাহক সাক্ষাৎ কৰি অসমৰ লগত জড়িত বিভিন্ন বিষয় অৱগত কৰে । বিয়লি কেন্দ্ৰীয় গৃহমন্ত্ৰীৰ চৰকাৰী বাসগৃহত অনুষ্ঠিত বৈঠকত শৰ্মাই অমিত শ্বাহক তেওঁৰ ৰাজ্য সম্পৰ্কীয় বিষয়সমূহৰ সন্দৰ্ভত আৰু সদ্য সমাপ্ত পঞ্চায়ত নিৰ্বাচনত এন ডি এৰ বৃহৎ বিজয়ৰ বিষয়ে অৱগত কৰে ।"
মুখ্যমন্ত্রীয়ে লগতে নক্সালবাদ নিৰ্মূল কৰাৰ ক্ষেত্ৰত লাভ কৰা সফলতাৰ বাবেও অমিত শ্বাহক প্ৰশংসা কৰে । ইফালে অসমৰ উদ্যোগ, বাণিজ্য আৰু ৰাজহুৱা উদ্যোগ মন্ত্ৰী বিমল বড়াই প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বত আৰু কেন্দ্ৰৰ অদম্য সমৰ্থনত অসমে উল্লেখযোগ্য অৰ্থনৈতিক অগ্ৰগতিৰ সাক্ষী হোৱা বুলি উল্লেখ কৰে ।
বিকশিত উত্তৰ-পূব বিনিয়োগকাৰী সন্মিলন ২০২৫ত (Rising Northeast Investors' Summit 2025) ‘আন্তঃগাঁথনি আৰু লজিষ্টিক’ বিষয়ক মন্ত্ৰীসভাৰ অধিবেশনত ভাষণ দি বড়াই কয়, "আমাৰ মুঠ ৰাজ্যিক ঘৰুৱা উৎপাদন (জি এছ ডি পি) ২০১৮ চনত ২.৮ লাখ কোটি টকাৰ পৰা ২০২৪ চনত ৫.৭ লাখ কোটি টকালৈ দুগুণতকৈও অধিক বৃদ্ধি পাইছে । এই বৃদ্ধি হৈছে আমাৰ জনসাধাৰণৰ স্থিতিস্থাপকতা আৰু দৃঢ়তাৰ প্ৰমাণ ।"
উল্লেখ্য যে, প্ৰধানমন্ত্ৰী নৰেন্দ্ৰ মোদীয়ে এই সন্মিলন উদ্বোধন কৰে । এই উপলক্ষে উত্তৰ-পূৰ্বাঞ্চলৰ উন্নয়ন বিভাগৰ (ড'নাৰ) কেন্দ্ৰীয় মন্ত্ৰী জ্যোতিৰাদিত্য এম সিন্ধিয়া, ড’নাৰৰ কেন্দ্ৰীয় ৰাজ্যিক মন্ত্ৰী ডঃ সুকান্ত মজুমদাৰ, মণিপুৰৰ ৰাজ্যপাল অজয় কুমাৰ ভল্লা, মুখ্যমন্ত্ৰী হিমন্ত বিশ্ব শৰ্মা আৰু ছিকিমকে ধৰি উত্তৰ-পূৰ্বাঞ্চলৰ অন্যান্য ৰাজ্যৰ মুখ্যমন্ত্ৰীসকলো উপস্থিত থাকে ।
আনহাতে, মন্ত্ৰী বিমল বড়াই কয় যে আন্তঃগাঁথনি বিনিয়োগ ২ লাখ কোটি টকাৰ পৰা ১১ লাখ কোটি টকালৈ বৃদ্ধি পাইছে । ই আঞ্চলিক উন্নয়নৰ প্ৰতি দেশৰ দায়বদ্ধতাক সূচাইছে । তেওঁ কয়, "আজি আমি এক পৰিৱৰ্তনশীল যাত্ৰাৰ শিখৰত থিয় দিছোঁ, যিয়ে অসমক চহকী সাংস্কৃতিক ঐতিহ্যৰ পৰা গতিশীল অৰ্থনৈতিক ভৱিষ্যতলৈ আগুৱাই লৈ গৈছে ।"
অসমক কেৱল প্ৰাকৃতিক সৌন্দৰ্য আৰু বৈচিত্ৰ্যময় সংস্কৃতিৰ দেশ নহয়, বৰং অৰ্থনৈতিক বিকাশ আৰু সুযোগৰ ৰেখা হিচাপে দ্ৰুতগতিত উত্থাপিত হোৱা ৰাজ্য হিচাপে প্ৰক্ষেপ কৰি বিমল বড়াই কয়, “গুৱাহাটীয়ে সাতভনীৰ ৰাজ্যৰ প্ৰৱেশদ্বাৰ হিচাপে কাম কৰা আমাৰ কৌশলগত স্থানে দক্ষিণ-পূব এছিয়াৰ বিশাল সম্ভাৱনাক আগবঢ়াই নিবলৈ আমাক অনন্য স্থান প্ৰদান কৰিছে ।”
বিমল বড়াই আঙুলিয়াই দিয়ে যে অসমৰ ৰপ্তানিৰ ক্ষেত্ৰত উল্লেখযোগ্য পৰিৱৰ্তন দেখা গৈছে । ২০১৭-১৮ চনত ৰপ্তানি ২,৪৭৪ কোটি টকাৰ পৰা ২০২৩-২৪ চনত ৩,৬৬৪ কোটি টকালৈ বৃদ্ধি পাইছে । ইয়াৰ মূল অৱদান হৈছে চাহ (৫৫ শতাংশ), পেট্ৰ'লিয়াম সামগ্ৰী (২৩ শতাংশ) আৰু ঔষধ (৫ শতাংশ) ।
উদ্যোগ আৰু বাণিজ্য মন্ত্ৰীগৰাকীয়ে লগতে কয় যে 'এক জিলা এক সামগ্ৰী' (অ’ ডি অ’ পি) পদক্ষেপে প্ৰতিখন জিলাৰ পৰা অহা অনন্য সামগ্ৰী যেনে মুগা, চাহ, আৰু হস্ততাঁতৰ সামগ্ৰী চিনাক্ত আৰু প্ৰচাৰত সহায় কৰিছে, যাৰ ফলত স্থানীয় উদ্যোগীকৰণ আৰু ৰপ্তানিৰ সম্ভাৱনা বৃদ্ধি পাইছে ।
বিমল বড়াই কয়, "অসমত ৩৫ খন জিলাত ২৯ টা অনন্য অ' ডি অ' পি সামগ্ৰী চিনাক্ত কৰা হৈছে । অঞ্চল নিৰ্দিষ্ট সামগ্ৰীৰ সুৰক্ষা, প্ৰচাৰ আৰু বাণিজ্যিকীকৰণৰ ক্ষেত্ৰত ভৌগোলিক সূচকাংকই (জি আই) গুৰুত্বপূৰ্ণ ভূমিকা পালন কৰে । ৩১ টা জিআই সামগ্ৰীৰে অসমে ৰাজ্যখনৰ চহকী সাংস্কৃতিক আৰু শিল্পকলাৰ উত্তৰাধিকাৰ প্ৰদৰ্শন কৰিছে ।"
তেওঁ লগতে কয় যে জাপি, কাঁহ-পিতলৰ শিল্প আৰু বিহুৰ ঢোলকে ধৰি অসমৰ জি আই সামগ্ৰীয়ে ৰাজ্যজুৰি শিল্পী, শিপিনী আৰু কৃষকৰ জীৱিকা অটুট ৰাখি গুৰুত্বপূৰ্ণ অৰ্থনৈতিক চালক হিচাপে কাম কৰিছে । বিমল বড়াই কয় যে চহকী প্ৰাকৃতিক সম্পদ আৰু কৌশলগত স্থানৰ সৈতে অসমৰ ৰপ্তানিৰ যথেষ্ট সম্ভাৱনা আছে ।
বিমল বড়াই কয়, "বিশ্বজুৰি ৰপ্তানি কৰা অসম চাহৰ বাবে ৰাজ্যখন বিখ্যাত । ইয়াৰ উপৰি মচলা, ফল-মূল, ঔষধি উদ্ভিদকে ধৰি অসমৰ প্ৰচুৰ কৃষিজাত সামগ্ৰীয়ে ৰপ্তানিৰ যথেষ্ট সুযোগ প্ৰদান কৰে । এছিয়ান দেশৰ সৈতে ইয়াৰ সান্নিধ্যই সীমা অতিক্ৰম কৰি বাণিজ্যৰ মূল অংশীদাৰ হিচাপে অসমৰ সম্ভাৱনা আৰু অধিক বৃদ্ধি কৰে ।"
