আহমেদাবাদ : এয়াৰ ইণ্ডিয়াৰ বিমান দুৰ্ঘটনাৰ তদন্ত কৰি থকা বিষয়াসকলে নিশ্চিত কৰিছে যে ককপিট ভইচ ৰেকৰ্ডাৰ উদ্ধাৰ হৈছে । যিয়ে দুৰ্ঘটনাৰ সম্ভাৱ্য কাৰণ নিৰ্ণয় কৰাত সহায় কৰিব । এই ককপিট ভইচ ৰেকৰ্ডাৰে নিশ্চিত কৰিব ২৭৫ ৰো অধিক লোক নিহত বিমান দুৰ্ঘটনাটোৰ কাৰণ । ইয়াৰ পূৰ্বে বিমান দুৰ্ঘটনা অনুসন্ধান ব্যুৰ'ৱে নিশ্চিত কৰিছিল যে বিমানখনৰ ফ্লাইট ডাটা ৰেকৰ্ডাৰ (এফডিআৰ) উদ্ধাৰ কৰা হৈছে ।
উল্লেখ্য যে, দেওবাৰে প্ৰধানমন্ত্ৰী নৰেন্দ্ৰ মোদীৰ প্ৰধান সচিব ড৹ পি কে মিশ্ৰই দেওবাৰে আহমেদাবাদৰ বিমান দুৰ্ঘটনাস্থলী পৰিদৰ্শন কৰে । সেই সময়ত বিমানৰ 'ব্লেক বক্স' উদ্ধাৰৰ কথাটো মিশ্ৰক অৱগত কৰিছিল বিষয়াসকলে ।
দেওবাৰে এক আনুষ্ঠানিক বিবৃতিত কোৱা হৈছে যে মিশ্ৰই আৱৰ্ত ভৱনত এক উচ্চ পৰ্যায়ৰ পৰ্যালোচনা বৈঠকৰ সভাপতিত্ব কৰে । য'ত তেওঁ কেন্দ্ৰ আৰু ৰাজ্য চৰকাৰ, এএআইবি আৰু ভাৰতীয় বিমানবন্দৰ কৰ্তৃপক্ষৰ উচ্চপদস্থ বিষয়াসকলৰ সৈতে চলি থকা সাহায্য, উদ্ধাৰ আৰু তদন্তৰ বিষয়ে আলোচনা কৰে ।
বিবৃতিটোত কোৱা হৈছে যে বিমান দুৰ্ঘটনা অনুসন্ধান ব্যুৰ'ৱে বিশদ তদন্ত আৰম্ভ কৰিছে আৰু আমেৰিকাৰ ৰাষ্ট্ৰীয় পৰিবহণ সুৰক্ষা ব'ৰ্ডে আন্তঃৰাষ্ট্ৰীয় প্ৰট'কলৰ অধীনত সমান্তৰাল তদন্ত চলাই আছে । কিয়নো বিমানখন আমেৰিকাত নিৰ্মিত আছিল । বিবৃতিত কোৱা হৈছে যে বিষয়াসকলে ড৹ মিশ্ৰক জনোৱা হৈছে যে ফ্লাইট ডাটা ৰেকৰ্ডাৰ (এফডিআৰ) আৰু ককপিট ভইচ ৰেকৰ্ডাৰ (চিভিআৰ)ৰ সুৰক্ষিতভাৱে উদ্ধাৰ কৰা হৈছে ।
ইফালে বিবৃতিটোত কোৱা হৈছে যে মিশ্ৰই মেঘানী নগৰৰ বি জে মেডিকেল কলেজৰ সমীপৰ দুৰ্ঘটনাস্থলীটো পৰিদৰ্শন কৰে । য'ত ৰাজ্য চৰকাৰ, এএআইবি আৰু ভাৰতীয় বিমানবন্দৰ কৰ্তৃপক্ষৰ জ্যেষ্ঠ বিষয়াসকলে তেওঁক পৰিস্থিতিৰ ক্ৰম আৰু তাৎক্ষণিক সঁহাৰিৰ ব্যৱস্থাৰ বিষয়ে অৱগত কৰে ।
আহমেদাবাদ অসামৰিক চিকিৎসালয় ভ্ৰমণৰ সময়ত তেওঁ শোকসন্তপ্ত পৰিয়ালসমূহক সাক্ষাৎ কৰে, ডি এন এৰ নমুনাৰ মিল পৰ্যবেক্ষণ কৰে আৰু কৰ্তৃপক্ষক সম্পূৰ্ণ সহায় আগবঢ়াবলৈ নিৰ্দেশ দিয়ে । তেওঁ আহত লোকসকলৰ সৈতেও মত বিনিময় কৰে ।
