কপ্পাল (কৰ্ণাটক): বৰ্তমান সময়ত এখন অটো ৰিক্সাৰ দাম কিমান আপুনি জানেনে ? প্ৰকাৰৰ ভিন্নতা অনুসৰি সম্ভৱতঃ ভাৰতীয় বজাৰত অটো ৰিক্সাৰ দাম ২-৩ লাখ টকা হ'ব । কিন্তু এজন অটো চালকক আদালতে জৰিমনা বিহিলে ১.৪১ কোটি টকা । এই জৰিমনা এখন অটো ৰিক্সাৰ দামৰ প্ৰায় ৩০ গুণ বেছি । কিন্তু চালকক কিয় জৰিমনা বিহিলে আদালতে ?
কৰ্ণাটকৰ গংগাৱতীৰ অসামৰিক ন্যায়ালয়ে এজন নাবালক অটো চালকৰ ওপৰত ১.৪১ কোটি টকাৰ জৰিমনা আৰোপ কৰিছে । নাবালক চালকজনৰ অপৰাধ আছিল যে তেওঁ অসাৱধানতাৰে অটো ৰিক্সা চলাই দুৰ্ঘটনা সংঘটিত কৰিছিল । য'ত এগৰাকী লোক নিহত হৈছিল আৰু কেইবাজনো গুৰুতৰভাৱে আহত হৈছিল । ২০২১ চনত য়েলাবুৰ্গাত সংঘটিত এই ঘটনা সন্দৰ্ভত কপ্পালৰ গংগাৱতী তালুক আইনী সেৱা সমিতিত এটা অভিযোগ দাখিল কৰা হৈছিল । গংগাৱতীৰ জয়নগৰৰ ৰাজশেখৰ আয়ানাগৌড়াৰ গুৰুতৰ আঘাতত মৃত্যু হৈছিল । মৃতকৰ পত্নী চান্নাম্মা আৰু আন লোকসকলে গোচৰটোত ক্ষতিপূৰণৰ বাবে আদালতৰ কাষ চাপিছিল ।
গোচৰটোৰ শুনানিত অতিৰিক্ত অসামৰিক ন্যায়ালয়ৰ ন্যায়াধীশ ৰমেশ এছ গানিগাৰাই অটোখন চলাই থকা নাবালকজনৰ বিৰুদ্ধে ১ কোটি ৪১ লাখ ৬১ হাজাৰ ৫৮০ টকাৰ ক্ষতিপূৰণৰ নিৰ্দেশ দিয়ে । এজন নাবালকে অটো চলোৱা বিষয়টো আদালতে গুৰুত্ব সহকাৰে লয় আৰু অটোৰ গৰাকীৰ ওপৰত বৃহৎ জৰিমনা আৰোপ কৰে ।
ঘটনাৰ বিৱৰণ :
গংগাৱতীৰ জয়নগৰৰ ৰাজশেখৰ আয়ানাগৌড়াই য়েলাবুৰ্গাৰ চৰকাৰী প্ৰথম শ্ৰেণীৰ মহাবিদ্যালয়ত সহকাৰী অধ্যাপক হিচাপে কাম কৰি আছিল । কৰ্তব্যৰ পিছত ঘৰলৈ উভতি অহাৰ সময়ত ৰাজাশেখৰে চহৰখনৰ স্বস্তিকা কম্পিউটাৰৰ ওচৰত বাইকখন পাৰ্ক কৰিছিল আৰু তেওঁৰ মোবাইল ফোনত কথা পাতি আছিল । সেই সময়তে এখন অটোৱে তেওঁক খুন্দিয়াই থৈ যায় । যাৰ ফলত তেওঁ গুৰুতৰভাৱে আহত হয় । পৰৱৰ্তী সময়ত চিকিৎসালয়ত ভৰ্তি কৰোৱা হয় যদিও চিকিৎসালয়ত তেওঁৰ মৃত্যু হয় । অটোখন চলাই আছিল এজন নাবালকে । ঘটনাটোৰ পিছত ৰাজশেখৰৰ পত্নী আৰু সন্তানে ক্ষতিপূৰণ বিচাৰি আদালতত এখন আবেদন দাখিল কৰে ।
লগতে পঢ়ক :উজনি মুৱা ট্ৰেইনত ডকাইতিকাণ্ড; চলন্ত ৰে’লৰ পৰাই দলিয়াই যুৱতীক হত্যা - ROBBERY IN MOVING TRAIN
