ବାଲେଶ୍ବର: ବାହାନଗା ଟ୍ରେନ୍ ଦୁର୍ଘଟଣାରେ ଆହତ ହୋଇ ବିଭିନ୍ନ ରାଜ୍ୟର ପାଖାପାଖି ହଜାରେ ଯାତ୍ରୀ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଅନେକଙ୍କ ସ୍ବାସ୍ଥ୍ୟବସ୍ଥା ଗୁରୁତର ରହିଛି । ଆହତମାନଙ୍କ ସ୍ବାସ୍ଥ୍ୟାବସ୍ଥା ଯାଞ୍ଚ କରିବାକୁ କର୍ଣ୍ଣାଟକ ଓ ଆନ୍ଧ୍ରପ୍ରଦେଶ ସରକାରଙ୍କ ମନ୍ତ୍ରୀମାନେ ବାଲେଶ୍ବରରେ ପହଞ୍ଚିଛନ୍ତି । ଆନ୍ଧ୍ରର ଶିଳ୍ପମନ୍ତ୍ରୀ ଅମରନାଥ ଗୁଡ଼ିପଦା ଓ କର୍ଣ୍ଣାଟକ ଶ୍ରମମନ୍ତ୍ରୀ ସନ୍ତୋଷ ଲାଡ୍ ବାଲେଶ୍ବର ହସ୍ପିଟାଲ ପରିଦର୍ଶନ କରି ନିଜନିଜ ରାଜ୍ୟର ଆହତ ଯାତ୍ରୀଙ୍କୁ ଭେଟିଛନ୍ତି ।
କରମଣ୍ଡଳ ଏକ୍ସପ୍ରେସ୍ରେ ହାୱଡାରୁ ଆନ୍ଧ୍ର ପ୍ରଦେଶର ବିଭିନ୍ନ ସ୍ଥାନକୁ ଯାତ୍ରା କରୁଥିବା ଅନେକ ଯାତ୍ରୀ ବର୍ତ୍ତମାନ ବାଲେଶ୍ବର ହସ୍ପିଟାଲରେ ଭର୍ତ୍ତି ହୋଇଛନ୍ତି । ସେମାନଙ୍କ ସମ୍ପର୍କରେ ଯାଞ୍ଚ କରିବାକୁ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ମନ୍ତ୍ରୀ ଅମରନାଥ ବାଲେଶ୍ବରରେ ପହଞ୍ଚିଛନ୍ତି । ଏହି ଅବସରରେ ସେ କହିଛନ୍ତି, "ବାଲେଶ୍ବରରେ ଘଟିଥିବା ଟ୍ରେନ ଦୁର୍ଘଟଣା ସାରା ଦେଶ ପାଇଁ ଖୁବ୍ ଦୁଃଖଦାୟକ । ସରକାରୀ ତଥ୍ୟ ଅନୁସାରେ, ଆନ୍ଧ୍ରର ୩୦୯ ଜଣ ଯାତ୍ରୀ କରମଣ୍ଡଳ ଏକ୍ସପ୍ରେସରେ ଟିକେଟ୍ କରିଥିଲେ । ସେମାନଙ୍କ ମଧ୍ୟରୁ ୧୬୫ ଜଣ ସୁରକ୍ଷିତ ଥିବାବେଳେ ୧୧ ଯାତ୍ରୀ ସାମାନ୍ୟ ଆହତ ଓ ୫୮ ଜଣଙ୍କୁ ଚିହ୍ନଟ କରାଯାଇ ନାହିଁ । ସେହିପରି ୨୫ ଜଣ ଯାତ୍ରୀଙ୍କ ଫୋନ୍ ବନ୍ଦ ଅଛି । ୩୦୯ ଯାତ୍ରୀରୁ ୫୭ ଜଣ ଯାତ୍ରା କରିନାହାନ୍ତି । ୩ ଜଣଙ୍କ ଫୋନ ନମ୍ବର ଉପଲବ୍ଧ ନାହିଁ ।"