নেশ্যনেল ডেস্ক,৪ জুন :ওড়িশাৰ ভয়ংকৰ ৰে'ল দুৰ্ঘটনাক লৈ শোকস্তব্ধ দেশবাসী (Balasore train accident)। মৰ্মাহত সকলো । দেশৰ ৰাষ্ট্ৰপতিয়ে এই দুৰ্ঘটনাক লৈ শোক প্ৰকাশ কৰিছে । সমান্তৰাল কৈ দেশৰ বিভিন্ন নেতা, অভিনেতা-অভিনেত্ৰী, ক্ৰীড়াবিদ সকলোৱে ঘটনাক লৈ শোকবাৰ্তা প্ৰেৰণ কৰিছে ।
অলিম্পিকৰ স্বৰ্ণ পদক বিজয়ী নীৰজ চোপ্ৰা আৰু অভিনৱ বিন্দ্ৰা, ভাৰতীয় ক্ৰিকেট দলৰ প্ৰাক্তন অধিনায়ক বিৰাট কোহলী আৰু আন কেইবাজনো খেলুৱৈয়ে ওড়িশাৰ বালাছোৰৰ ৰে'ল দুৰ্ঘটনাত শোক প্ৰকাশ কৰিছে । খেলুৱৈসকলে এই দুৰ্ঘটনাত নিহতসকলৰ আত্ম সদগতিৰ বাবে প্ৰাৰ্থনা কৰিছে । সমান্তৰালকৈ আহতসকলৰ আশু আৰোগ্য কামনা কৰিছে ।
বিৰাট কোহলীয়ে বালাছোৰ ৰে'ল দুৰ্ঘটনা সম্পৰ্কে এটা টুইটাৰ পোষ্ট শ্বেয়াৰ কৰিছে (Virat Kohli tweet over Balasore train accident)। কোহলীয়ে লিখিছে "ওড়িশাত সংঘটিত শোকাৱহ ৰে'ল দুৰ্ঘটনাৰ বিষয়ে শুনি দুখ পাইছো । মোৰ সমবেদনা আৰু প্ৰাৰ্থনা সেই পৰিয়ালবোৰৰ প্ৰতি যিসকলে তেওঁলোকৰ প্ৰিয়জনক হেৰুৱাইছে আৰু আহতসকলৰ আশু আৰোগ্য কামনা কৰিছো ।" অলিম্পিকত পদক বিজয়ী নীৰজ চোপ্ৰাই টুইট কৰি লিখিছে, "ওড়িশাৰ ভয়ংকৰ দুৰ্ঘটনাৰ বাতৰি পঢ়ি মৰ্মাহত হৈছো । ভুক্তভোগীসকলৰ প্ৰতি মই সমবেদনা জ্ঞাপন কৰিছো ।"