రెండురోజుల్లో ఎన్ని"కోట్లు" తాగేశారో తెలుసా?

మద్యం ప్రియులు తమ ప్రేమను చాలా ఘాటుగా చూపించారు. రెండ్రోజుల్లోనే 380 కోట్ల విలువైన మద్యం తాగి కిక్కెక్కించారు. నూతన సంవత్సర వేడుకల సందర్భంగా రాష్ట్రంలో మద్యం ప్రియులు మద్యాన్ని మంచినీళ్లలా తాగారు.

రాష్ట్రంలో నూత‌న సంవ‌త్స‌ర వేడుక‌ల సంద‌ర్భంగా మ‌ద్యం ప్రియులు మ‌ద్యంలో మునిగి తేలారు. డిసెంబ‌రు 30, 31 తేదీల్లో రూ.380 కోట్లు విలువైన మ‌ద్యాన్ని మంచినీళ్ల ప్రాయంలా మందుబాబులు తాగేశారు. సాధార‌ణంగా రోజుకు రూ.60 నుంచి 70 కోట్లు మ‌ద్యం విక్ర‌యాలు జ‌రుగుతాయి. అయితే 30, 31 తేదీలల్లో ఏకంగా దాదాపు రూ.380 కోట్ల విలువైన మ‌ద్యం విక్రయం జరిగింది.

ఈ రెండు రోజుల్లో ఏకంగా రూ. 380 కోట్లు విలువైన 4.85 లక్షల కేసుల లిక్కర్, 5.10 కేసుల బీరు మద్యం అమ్మ‌కాలు జ‌రిగాయ‌ని ఆబ్కారీ శాఖ లెక్క‌లు వెల్ల‌డించాయి. ఇందులో హైదారాబాద్‌, రంగారెడ్డి, మేడ్చ‌ల్ ఈ మూడు జిల్లాల్లో సింహ‌భాగం మ‌ద్యం అమ్మ‌కాలు జ‌ర‌గ్గా.. మిగిలిన మద్యం తదితర జిల్లాల్లో విక్ర‌యాలు జ‌రిగిన‌ట్లు ఎక్సైజ్ అధికారులు తెలిపారు.

డిసెంబ‌రు నెల‌లో రూ. 2050 కోట్లు విలువైన మద్యం అమ్ముడుపోయినట్లు అధికారులు తెలిపారు. ఇందులో 30.80 ల‌క్ష‌ల లిక్క‌ర్, 35 ల‌క్ష‌ల కేసులు బీరు అమ్మ‌కాలు జ‌రిగాయ‌న్నారు. స‌గ‌టున రోజుకు రూ. 66 కోట్లు మ‌ద్యాన్ని రాష్ట్రంలోని మ‌ద్యం ప్రియులు తాగేశారు. హైద‌రాబాద్ న‌గ‌రంలో రూ.270 కోట్లు, రంగారెడ్డి జిల్లా ప‌రిధిలో రూ.540 కోట్లు, మేడ్చ‌ల్ జిల్లాలో దాదాపు 250 కోట్లు లెక్క‌న మ‌ద్యం విక్ర‌యాలు జ‌రిగిన‌ట్లు అధికారులు తెలిపారు.

ఇవీ చూడండి: రాష్ట్రవ్యాప్తంగా 3148 డ్రంక్​ అండ్ డ్రైవ్​ కేసులు