నీరు-చెట్టు గొప్ప కార్యక్రమం...
వైకాపా ప్రభుత్వ వైఖరిపై నిరసన తెలిపామని ప్రతిపక్ష నేత చంద్రబాబు తెలిపారు. ప్రభుత్వ తప్పుడు విధానాలు చర్చకు రాకుండా చేస్తున్నారన్న చంద్రబాబు... దేశంలోనే నీరు - చెట్టు గొప్ప కార్యక్రమమని చెప్పారు. నీరు - చెట్టు కార్యక్రమాన్ని కేంద్రం గతంలో ప్రశంసించిన విషయం గుర్తుచేశారు. ప్రజావేదిక కట్టేందుకు 8 నెలలు పట్టిందన్న చంద్రబాబు... కొన్ని గంటల్లోనే కూల్చారని ఆవేదన వ్యక్తం చేశారు.
వైకాపా బెదిరింపులకు ఎవరూ భయపడరు...
అసెంబ్లీ అనేది ప్రజాసమస్యలను చర్చించే వేదికని... సీఎం జగన్ ఇష్టం వచ్చినట్లు మాట్లాడుతున్నారని చంద్రబాబు ఆగ్రహం వ్యక్తం చేశారు. హుందాతనం పెంచుకోవాలని హితవు పలికారు. జగన్ తన నోటిని అదుపులో పెట్టుకోవాలని చంద్రబాబు సూచించారు. వైకాపా బెదిరింపులకు ఎవరూ భయపడరని ఉద్ఘాటించారు. తాము మాట్లాడేసరికి మైక్ ఆపేస్తున్నారని ఆవేదన వ్యక్తం చేశారు. ప్రజా సమస్యలపై తెదేపా సభ్యులు గట్టిగా పోరాడారని చెప్పుకొచ్చారు.
కేసీఆర్, జగన్ అధికారం శాశ్వతం కాదు...
కేసీఆర్, జగన్ కు అధికారం శాశ్వతం కాదని చంద్రబాబు పేర్కొన్నారు. నదీజలాలపై రైతులు, యువత, ఇంజినీర్లు చర్చించాలన్న చంద్రబాబు... ఇది రెండురాష్ట్రాల ప్రజల సమస్య అని చెప్పారు. నదీజలాలు అనేవి రాష్ట్ర హక్కులకు సంబంధించిన విషయమని... మన నీళ్లు మనం వాడుకుందాం, వాళ్ల నీళ్లు వాళ్లను వాడుకోనివ్వండని ప్రభుత్వానికి సూచించారు. బొల్లాపల్లి ప్రాజెక్టు పూర్తయితే గ్రావిటీ ద్వారా సాగర్‌కు నీళ్లు వెళ్తాయని వివరించారు.
అభివృద్ధిని వక్రీకరించే ప్రయత్నం చేస్తున్నారు...
వంశధార ప్రాజెక్టుపై అధికార పార్టీ నేతలు అవాకులు, చెవాకులు మాట్లాడుతున్నారని చంద్రబాబు ధ్వజమెత్తారు. తోటపల్లి ప్రాజెక్టు పనులు వేగవంతం చేశామన్న చంద్రబాబు... గత ఐదేళ్లలో జరిగిన అభివృద్ధిని వక్రీకరించే ప్రయత్నం చేస్తున్నారని దుయ్యబట్టారు. అవినీతిలో మునిగిన వ్యక్తి ఇప్పుడు నీతి, నిజాయతీ గురించి మాట్లాడుతున్నారని ఎద్దేవా చేశారు. నదీజలాలపై గతంలో జగన్ మాట్లాడిన మాటలను చంద్రబాబు ఈ సందర్భంగా ప్రస్తావించారు.
ఇదీ చదవండి...
