How To Download e-EPIC Card : ఓట్ల పండుగకు సమయం సమీపిస్తోంది. వజ్రాయుధం లాంటి ఓటుతో దాదాపు 97 కోట్ల మంది భారత ప్రజానీకం తీర్పునిచ్చే కీలక ఘడియలు ఎంతో దూరంలో లేవు. ఈ తరుణంలో ప్రతీ ఓటరు బాధ్యతగా తమ ఓటుకు సంబంధించిన అన్ని వివరాలను ఒకటికి రెండుసార్లు చెక్ చేసుకోవడం మంచిది. ప్రత్యేకించి ఓటరు గుర్తింపు కార్డును ప్రింట్ తీసుకొని రెడీగా పెట్టుకోవాలి. దీంతోపాటు అందరూ తప్పకుండా ఈ-ఎపిక్ కార్డును (e-EPIC Card) కూడా డౌన్లోడ్ చేసుకోవాలి. మరేం లేదు ఇది మన ఓటరు ఐడీ కార్డుకు డిజిటల్ వర్షన్. దీనికి సంబంధించిన సమస్త సమాచారాన్ని మీరు ఈ కథనంలో పొందొచ్చు.
e-EPIC కార్డు అంటే ఏమిటి?
ఈ-ఎపిక్ కార్డు (e-EPIC Card) అనేది మన ఓటరు గుర్తింపు కార్డుకు పీడీఎఫ్ వర్షన్. అయితే ఇందులో ప్రత్యేకమైన నంబర్ ఒకటి ఉంటుంది. దాన్నే EPIC నంబర్ అంటారు. ఈ-ఎపిక్ కార్డు పీడీఎఫ్‌ను డౌన్లోడ్ చేసుకొని మన మొబైల్ లేదా కంప్యూటర్‌లో సేవ్ చేసుకోవచ్చు. ఈ-ఎపిక్ కార్డు పీడీఎఫ్‌ను డిజి లాకర్‌ అకౌంటులోనూ అప్‌లోడ్ చేసి స్టోర్ చేయొచ్చు. పోలింగ్‌కు కొన్ని రోజుల ముందు దాన్ని ప్రింట్ తీసి లామినేషన్ చేయించుకుంటే సరిపోతుంది.
e-EPIC నంబర్ మీకు లేదా?
ఓటరు గుర్తింపు కార్డుకు ఫోన్ నంబర్ లేదా మెయిల్ ఐడీని లింక్ చేసుకున్న వారంతా e-EPIC కార్డును వెంటనే డౌన్లోడ్ చేసుకోవచ్చు. ఒకవేళ అవి లింక్ అయి లేకుంటే https://voters.eci.gov.in/signup అనే వెబ్ లింక్‌‌ను ఫాలో అయి ఆ ప్రాసెస్‌ను పూర్తి చేయొచ్చు. ఈక్రమంలో మీరు సమర్పించే ఫోన్ నంబరు లేదా మెయిల్ ఐడీకి ఓటీపీ వస్తుంది. దాన్ని ఎంటర్ చేశాక అప్రూవల్ లభించి మీ ఓటరు ఐడీపై EPIC నంబర్ జారీ అవుతుంది.
e-EPIC డౌన్లోడ్ ఎలా?
- మీరు ఈ-ఎపిక్ కార్డును http://voterportal.eci.gov.in/ లేదా https://nvsp.in/ లేదా ఓటర్ హెల్ప్‌లైన్ మొబైల్ యాప్ ద్వారా డౌన్లోడ్ చేసుకోవచ్చు.
- ఈ పోర్టల్‌లలో ఏదో ఒకదానిలోకి వెళ్లాక తొలుత నమోదు/లాగిన్ చేయాలి.
- అనంతరం మెనూ నావిగేషన్ నుంచి డౌన్లోడ్ e-EPIC అనే ఆప్షన్‌పై క్లిక్ చేయాలి.
- వెంటనే తెరుచుకున్న పేజీలో ఎపిక్ నంబర్ లేదా మీ ఫోన్ నంబరును నమోదు చేయాలి.
- రిజిస్టర్డ్ మొబైల్ నంబర్‌కు వచ్చిన ఓటీపీని పోర్టల్‌లో నమోదు చేసి ధ్రువీకరణ పొందాలి.
- దీంతో మీ మొబైల్ నంబర్ ఆధారంగా ఈ-ఎపిక్ కార్డు జారీ అవుతుంది.
- చివర్లో డౌన్లోడ్ e-EPIC అనే ఆప్షన్ కనిపిస్తుంది.
- దాన్ని క్లిక్ చేసి ఈ- ఎపిక్ కార్డు పీడీఎఫ్ వర్షన్‌ను డౌన్లోడ్ చేసుకొని సేవ్ చేసుకోవాలి.
- ఒకవేళ మీ ఫోన్ నంబర్ నమోదు కాకపోతే KYCని పూర్తి చేయడానికి e-KYC ఆప్షన్‌పై క్లిక్ చేయాలి.
- అనంతరం ఫేస్ లైవ్‌నెస్ వెరిఫికేషన్‌లో మీరు పాస్ కావాల్సి ఉంటుంది.
- KYCని పూర్తి చేయడానికిగానూ మీ మొబైల్ నంబర్ను అప్‌డేట్ చేయండి.
- ఆ తర్వాత మీరు e-EPICని డౌన్లోడ్ చేసుకోవచ్చు.
e-EPICని పోగొట్టుకుంటే ఎలా?
ఒకవేళ మీరు మీ ఈ-ఎపిక్ కార్డును పోగొట్టుకుంటే ఆందోళన చెందాల్సిన అవసరం లేదు. http://voterportal.eci.gov.in/ లేదా http://electoralsearch.in/ పోర్టల్‌లోకి వెళ్లి ఎలక్టోరల్ రోల్‌లో మీ పేరును సెర్చ్ చేయండి. అక్కడే మీ పేరుతో పాటు ఎపిక్ నంబర్ కూడా కనిపిస్తుంది. దానిపై క్లిక్ చేసి ఈ-ఎపిక్ కార్డును వెంటనే డౌన్లోడ్ చేసుకోవచ్చు.
e-EPIC కార్డుతో ప్రయోజనం ఏమిటి?
డిజిటల్ ఫార్మాట్‌లో ఓటర్లు తమ గుర్తింపు సమాచారాన్ని భద్రపర్చుకునే అత్యుత్తమ ప్రత్యామ్నాయం ఈ-ఎపిక్ కార్డు. దీని పీడీఎఫ్ ఫోన్లో ఉంటే ఓటరు గుర్తింపు కార్డు ప్రింట్‌ను పోలింగ్ కేంద్రానికి తీసుకెళ్లాల్సిన అవసరం ఉండదు. మన ఫోన్ నంబర్, మెయిల్ ఐడీ వంటి వివరాలు కూడా ఓటరు ఐడీతో అటాచ్ కావడానికి దోహదం చేస్తున్న అత్యుత్తమ మార్గం ఈ-ఎపిక్ కార్డు.
