ചെന്നൈ: 2024 ലോക്‌സഭ തെരഞ്ഞെടുപ്പില്‍ കോയമ്പത്തൂരില്‍ നിന്നും മത്സരിക്കുമെന്ന് നടന്‍ കമല്‍ ഹാസന്‍. കോയമ്പത്തൂരില്‍ നിന്നും തനിക്ക് മികച്ച ജനപിന്തുണയാണ് ലഭിക്കുന്നതെന്നും അദ്ദേഹം വ്യക്തമാക്കി. ലോക്‌സഭ തെരഞ്ഞെടുപ്പുമായി ബന്ധപ്പെട്ടുണ്ടായ മക്കള്‍ നീതി മയ്യം യോഗത്തിലാണ് നടന്‍ ഇക്കാര്യം അറിയിച്ചത്.
ലോക്‌സഭ തെരഞ്ഞെടുപ്പില്‍ ഒറ്റയ്‌ക്ക് മത്സരിക്കണോ സഖ്യമുണ്ടാക്കണോയെന്നതും യോഗം ചര്‍ച്ച ചെയ്‌തു. 2021 കോയമ്പത്തൂര്‍ സൗത്ത് അസംബ്ലിയില്‍ നിന്നും കമല്‍ ഹാസന്‍ മത്സരിച്ചിരുന്നു. ബിജെപി സ്ഥാനാര്‍ഥി വാനതി ശ്രീനിവാസനുമായുള്ള മത്സരത്തില്‍ ഏതാനും വോട്ടുകള്‍ക്ക് കമല്‍ ഹാസന്‍ പരാജയപ്പെട്ടു. ആ തെരഞ്ഞെടുപ്പില്‍ കോയമ്പത്തൂരിലെ മറ്റ് നിയോജക മണ്ഡലങ്ങളില്‍ മക്കള്‍ നീതി മയ്യം ഏതാനും വോട്ടുകള്‍ നേടിയിരുന്നു. 2018ലാണ് കമല്‍ മക്കള്‍ നീതി മയ്യം സ്ഥാപിച്ചത്.
തമിഴ്‌നാട്ടിലെ നാല് ജില്ലകളിലെ മക്കള്‍ നീതി മയ്യം പ്രവര്‍ത്തകരുടെ യോഗമാണ് ഇന്ന് കോയമ്പത്തൂരില്‍ നടന്നത്. ചെന്നൈ സൗത്ത്, കോയമ്പത്തൂര്‍ എന്നിവിടങ്ങളില്‍ മക്കള്‍ നീതി മയ്യം പ്രവര്‍ത്തകര്‍ കൂടുതല്‍ ശ്രദ്ധ കേന്ദ്രീകരിക്കണമെന്ന് കമല്‍ ഹാസന്‍ നേരത്തെ നിര്‍ദേശിച്ചിരുന്നു. ഇതിന്‍റെ ഭാഗമായി രണ്ടിടങ്ങളിലും പ്രവര്‍ത്തനം കൂടുതല്‍ ശക്തമാക്കുകയും ചെയ്‌തിരുന്നു. 40 മണ്ഡലങ്ങളില്‍ മത്സരത്തിന് തയ്യാറാകണമെന്നും കമല്‍ ഹാസന്‍ പ്രവര്‍ത്തകര്‍ക്ക് നിര്‍ദേശം നല്‍കിയിരുന്നു.
ഉദയനിധി സ്റ്റാലിന്‍റെ സനാതന പരാമര്‍ശത്തിലും പ്രതികരണം: സംസ്ഥാനത്ത് ഏറെ വിവാദം സൃഷ്‌ടിച്ച് കൊണ്ടിരിക്കുന്ന ഉദയനിധി സ്റ്റാലിന്‍റെ സനാതന പരാമര്‍ശത്തെ കുറിച്ചും കമല്‍ ഹാസന്‍ പ്രതികരിച്ചു. 'സനാതന പരാമര്‍ശം നേരത്തെ പെരിയാര്‍ അടക്കമുള്ളവര്‍ പറഞ്ഞിട്ടുണ്ടെന്ന്' അദ്ദേഹം പറഞ്ഞു. ദൈവം ഇല്ലെന്ന് പറയുകയല്ല പെരിയാറിന്‍റെ ജോലി.
സമൂഹത്തിന് വേണ്ടി അവസാനം വരെ ജീവിച്ചയാളാണ് പെരിയാര്‍. ഡിഎംകെക്കോ മറ്റേതെങ്കിലും പാര്‍ട്ടിക്കോ പെരിയാര്‍ തങ്ങളുടേതാണെന്ന് പറയാനാകില്ലെന്നും അദ്ദേഹം പറഞ്ഞു. തമിഴ്‌നാട് സംസ്ഥാനം മുഴുവന്‍ വിശ്വസിക്കുന്നത് പെരിയാര്‍ തങ്ങളുടേതാണെന്നാണ്. തമിഴ്‌ ജനതയോട് ഇത് നേരത്തെ പറഞ്ഞ കാര്യങ്ങളാണ്.
ഉദയനിധി സ്റ്റാലിനെതിരെ ഇപ്പോള്‍ അനാവശ്യമായി വിവാദങ്ങള്‍ സൃഷ്‌ടിക്കുകയാണ്. സ്‌നേഹമാണ് തന്‍റെ മതമെന്നും എല്ലാവരും ഐക്യത്തോടെ നില്‍ക്കണമെന്നും കമല്‍ ഹാസന്‍ പറഞ്ഞു.' പാര്‍ലമെന്‍റ് തെരഞ്ഞെടുപ്പ് ഉടനുണ്ടാകും. തെരഞ്ഞെടുപ്പില്‍ ജയിച്ചാല്‍ താന്‍ എംഎല്‍എ ആകുമെന്നും മറിച്ച് പരാജയപ്പെട്ടാല്‍ തനിക്ക് സങ്കടം ഉണ്ടാകില്ലന്നും അദ്ദേഹം പറഞ്ഞു. ഈ പ്രായത്തില്‍ രാഷ്‌ട്രീയത്തില്‍ ഇറങ്ങിയതിന് ഞാന്‍ മാപ്പ് ചോദിക്കുകയാണ്. മുന്‍ മുഖ്യമന്ത്രി കരുണാനിധി തന്നെ ഡിഎംകെയിലേക്ക് ക്ഷണിച്ചിരുന്നുവെന്നും അദ്ദേഹം വ്യക്തമാക്കി.
